【職場生存必備系列—尋找好Mentor(下集)】#Mentor必備四大條件
上回講到，喺職場上有個好Mentor嘅重要性，當你迷途小羔羊時會指點迷津，令你行少好多冤枉路。不過，雖然Mentor都係前輩，但唔係所有前輩都做到Mentor，一個唔覺意揀中職場old seafood，就真係跟錯師傅學壞師，影響一生喇！今日，教大家分辨點先為之係好Mentor。
第一，彼此之間有信任感
遇到好嘅Mentor，你係會完全放下戒心，大膽分享自己嘅睇法同感受；同樣，對方亦會毫無保留向你分享過往經歷，等你可以從中有所得着。
第二，發掘潛能獨具慧眼
每個人都有擅長嘅地方，希望有發揮才能機會，而Mentor就係專門發掘千里馬嘅伯樂。喺日常工作相處時間，會透過仔細觀察同分析，發掘你優點同缺點，然後提供有利你事業發展嘅建議。
第三，互相尊重互相學習
對住好Mentor，你會打從心底欣賞同佩服對方，咁樣對方分享經驗，或者提出建議嘅時候，你先會聽得入耳。另一方面，Mentor唔會擺出永遠都啱嘅姿態，只會喺專業嘅地方引領你，同埋會尊重你做最終任何決定。
第四，卓見前瞻洞悉先機
好Mentor工作閱歷豐富、洞悉力強，善於由大局出發。就算遇到任何事，亦可以保持客觀態度理性思考，作出智慧判斷、分析同提出有效意見。
就算覓得好Mentor，緊記對方唔係免費義工，無義務做你私人consultant，亦唔好大安旨意會幫你解決任何問題。仲有向對方求助之前，最好先行思考，諗出可行嘅方法再作討論。正如企業明星教練Marshall Goldsmith所講：職場上，理想師徒關係應該係「支持」而非「救援」。
Search